Макал лакаптар жыйнагы (О)

О тамгасына кыргызча макал лакаптар жыйнагы — бул жыйнакта билим, ден-соолук, адамдар, мекен, жамандык-жакшылык, кыз-жигит, эрди-катын, эл башчылары, жаныбарлар, эмгек, акылдуулук, пайда-пайдасыз, тил, эне-ата, акыйкаттык жана башка көптөгөн турмуш-тиричиликке байланышкан кыргыз эл макал лакаптарын жыйнадык.

Достор О тамгасына болгон макал лакаптар көп эмес, ошондуктан силер дагы өз салымыңыздарды кошуп, пикир жазуу формасына О тамгасынан башталган макалдарды кошсоңуз болот. Заманбап, жаңы макалдар дагы жаза бергиле, макалар элдики.

О

• О дүйнөнүн бейишинен бу дүйнөнүн тозогу артык.
• Обозгер жакшы — кан жакшы, катын жакшы — эр жакшы.
• Оболу тамак, анан кийин сабак.
• Обоо менен шыйпаң дос.
• Обоого шыйпаң үйүр.
• Обу жок катын оорсок уй саайт.
• Обу жокко кыйшаң үйүр.
• Обу жоктун отуна жылынба.
• Обур уй чобур музоо тууйт.
• Обур уйдан чобур музоо туулат.
• Обуру жеткен молдодон, отоо чөптүн зыяны аз.
• Одоно соккон күмүштөн, сулуулап соккон мис артык.
• Оё бычкан, тоё жейт.
• Озунган — утат.
• Озунган (жигит) оодарат.
• Озунган таз бөрк алат.
• Ой — өзүңдө, нарк — колунда.
• Ой — сөздүн булагы, ой — сөздүн сандыгы.
• Ой жеткен менен кол жетпейт.
• Ой ойлосоң — тең ойло, тең ойлосоң кең ойло.
• Ой октон ылдам.
• Ой өзүндө, нарк колуңда.
• Ой түбүндө алтын бар, ойлой билсең табасың.
• Ойдо — эгин, тоодо — токой.
• Ойдо барга кол жетпейт.
• Ойдон бир уйдун мүйүзү сынса, тоодон миң уйдун мүйүзү зыркырайт (сынат).
• Ойдун гүлдөгөнү — акылдын өркүндөгөнү.
• Ойдун да, бойдун да ортосу жакшы.
• Ойдун түбү жок, сөздүн чеги жок.
• Ойдун чалы сөздөн таяк таянат.
• Ойлобой — баштаба, баштасаң — таштаба.
• Ойлобой сүйлөгөн онтобогон ооруга жолугат.
• Ойлобой сүйлөгөн оорубай өлөр.
• Ойлогон ойду кыстаган турмуш жеңет.
• Ойлогонун бербеген онтотпой ооруга жолугат.
• Ойлоп сүйлө, байкап отур.
• Ойлуу жердин уурусу, тоолуу жердин бөрүсү.
• Оймоксуз аял болбойт.
• Ойногон бала от басат.
• Ойноонун да ыгы бар, ойлоонун да сыры бар.
• Ойноп айт, ойноп айтсаң да ойлоп айт.
• Ойноп айтам деп, оюндагысын айтып алыптыр.
• Ойноп айтса да, оюндагысын айтат.
• Ойноп жатып ыйлаган бала таз болот.
• Ойноп сүйлөсө да (айтам деп), оюндагысын айтат.
• Ойноп сүйлөсөң да, ойлоп сүйлө.
• Ойнош — оттон ысык, агер калса — боктон сасык.
• Ойноштон Эр ӨЛӨТ.
• Ойношчул катын ыйлап ишендирет.
• Ойношчул катындан шылдыңчыл уул туулат.
• Ойношчул катынды көзүнөн тааны.
• Ойт десе, «кыйт» дейт.
• Ойчул ойлогуча, тобокелчил барып келиптир.
• Ойчул ойлогуча, тобокелчил үйүнө барат.
• Ойчул ойлонгуча, тобокелчи кечип өтүптүр.
• Ойчул оюна жеткиче, тобокелчил барып келиптир.
• Ок аткан жоодон сыр ачкан өз жаман.
• Ок жарасынан сөз жарасы жаман.
• Окуган — жарык, окубаган — чарык.
• Окуганыңды айтпай, токуганыңды айт.
• Окуй берсең — көзүңдү ачат, отура берсең жалкоолук басат.
• Окусаң озорсуң, окубасаң тосоорсуң.
• Окусаң озосуң, окубасаң тозосуң.
• Окуу — билим азыгы, билим — ырыс азыгы.
• Окуу — бул эмгек, эмгекчил болсоң — алга барасың, эмгексиз болсоң — артта каласың.
• Окуу — жакшылык, окуусуз — караңгылык.
• Окуунун түбү жок.
• Окшогонго жарашкан, же окшогонго мушташкан.
• Окшошконго — мушташкан.
• Олбуй — солбуй теминген, оң — тетири камчы урат.
• Олдоксон төөнү жазэ муштайт.
• Олпок салганга олпок сал, талпак салганга талпак сал.
• Олтурган кыз ордун табат.
• Олуя да жакынын колдойт.
• Олуя да жанындагысын колдойт.
• Омурткасын оркойтуп, орокчу болот кембагал, кабыргасын каржайтып, күчтүү болот кембагал.
• Он күндүк ашың болгончо, бир күндүк эшиң (ишиң же дос) болсун.
• Он түгөттөн — бир табышкер артык.
• Он эки пайгамбардан, бир кудай өтүптүр.
• Он экинин бири жок, уй байларга жиби жок.
• Онтоткон — оору, мөгдөткөн — кары.
• Онтоткон — оору, мөгдөткөн — карылык.
• Оң колуңдун ачуусу келсе, сол колуң менен карма.
• Оң колуңдун ачуусун сол колуң менен карма (же токтот, арачала).
• Оң колуңдун ачуусун, сол колуң менен бас.
• Оңко оюн бузат, тентек жыйын бузат.
• Оңсоң да өзүңдөн, тоңсоң да өзүңдөн.
• Ообозгер жакшы — кап жакшы, катын жакшы — эр жакшы.
• Оогон жыгылганга күлөт.
• Оогон талганга күлөт.
• Ооз — бирөө, кулак экөө, бир сүйлөсөң, он тыңша.
• Ооз — сөздүн ээси.
• Ооз — уя, сөз — куш, унчукпаган — байкуш.
• Ооз айгак, тил — тайгак.
• Ооз айгак, тил таңгак.
• Ооз деген дарбаза, чыга берет аңдаса.
• Ооз жыйып алганча, омуртка сынаар иш да бар.
• Ооз кыйшык болсо да, сөз түз болсун.
• Ооздон — оозго өтөт сөз шекери, үйдөн үйгө кирет иш бекери.
• Ооздон кан чыкса да, душманга ырыңды ырдаба.
• Ооздон чыккан сөз — колдон учкан куш.
• Ооздон чыккан сөз отуз уруу элге таралат.
• Ооздон чыкты — ааламдан чыкты.
• Оозду бүйрүсө болот, көздү сүзсө болот, бу кудай урган мурунду кантсе болот.
• Ооздун жели опаа болбойт.
• Оозу ашка тийгенде, тумшугу ташка тийди.
• Оозу жаман элди булгайт, буту жаман төрдү булгайт.
• Оозу жаман элди булгайт, өтүгү жаман төрдү булгайт.
• Оозу жамандын сөзү жаман.
• Оозу күйгөн — айранды үйлөп ичет.
• Оозу кыйшык болсо да, байдын уулу сүйлөсүн.
• Оозу менен орок оргон (колу менен иштебеген), буту менен машак терет (башмалдак атат), оозун көптүргөн жумуштан качат.
• Оозу оорубагандын, кулагы (таңдайы) жоорубайт.
• Оозу сүткө күйгөн айранды да үйлөп ичет.
• Оозу таңылган музоо энесинин эмчегин тумшугу менен койгулайт.
• Оозу чалпоо жигиттин бир ажалы элинен, аягы суюк аялдын бир ажалы эринен.
• Оозу чоңго — аш, көзү чоңго — жаш.
• Оозун бакпаган орой болот.
• Оозун баспай тим жүргөн оозун ачып кур калат.
• Оозуна алы жетпеген — оңколойт.
• Оозуна алы жетпеген — осол.
• Оозуна келгенин оттогон, укпаган сөздүугат.
• Оозунан ак ит кирип кара ит чыккан, эртеңкини эмес, эмикини унуткан.
• Оозунан алдырган бөрүдөй.
• Оозунан жаңылган турбайт, бутунан жаңылган турат.
• Оозунан кулаган турбайт, бутунан кулаган турат.
• Оозунан сөзү түшкөндүн колунан бөзү түшөт.
• Оозунан сөзү түшкөндүн, колунан иши түшөт.
• Оозунда кеби бардын, сөзүндө эми бар.
• Оозунда келмеси бардын, башында селдеси бар.
• Оозуң кайсы десе, мурдун көрсөтөт.
• Оозуңан чыккан, сакалыңа жармашат.
• Оокат — байдан, ажал — кудайдан.
• Оолак болсо да жол жакшы.
• Оолукмалуу балага ээликмелүү жин тиет.
• Оомалуу — төкмөлүү дүнүйө.
• Оомалуу кезек, төкмөлүү дүйнө.
• Оор иштен коркпо, оор сөздөн корк.
• Оорго чыдашып, женилди колдон алышты.
• Оору — кор, өлүм — зар.
• Оору — өмүр бычагы, орой сөз — көңүл бычагы.
• Оору аштан, доо — карындаштан.
• Оору батмандап кирип, мыскылдап чыгат.
• Оору кадырын сак билбейт, өлүк кадырын тирик билбейт.
• Оору кадырын соо билбейт, ач кадырын ток билбейт.
• Оору кайда болсо, жан ошол жерде.
• Оору калса да, адат калбайт.
• Оору оору эмес, оору баккан оору.
• Оору тилинин эми барды издебей, колунун эми барды издейт.
• Оору эмгектен качат, эмгек көңүлдү ачат.
• Оорубаган онтобойт.
• Оорубаган өлүмдөн коркпойт.
• Оорубай өлөйүн десең, эски дубалдын түбүнө жат.
• Ооруган башка — темир тарак.
• Ооруган жерден кол кетпейт.
• Ооруган жериң урунду болот.
• Ооруганды сураса айыкканга тете (кээде эсе).
• Ооруда чанчуу жаман, сөздө каңкуу жаман.
• Оорудан (кеселден) чанчуу жаман, кептен каңкуу жаман.
• Оорукта уйкучу уул, чабыкта башын сайга таштайт.
• Оорулуу жылмайса — айыкканга тете, арамза жылмайса — алдаганга тете.
• Оорулууга жардам берсең эсели эсинен кетпейт.
• Оорулуунун ою онго бөлүнөт.
• Оорулуунун оюна эмне келип, эмне кетпейт.
• Ооруну жашырсаң, өлүм ашкерелейт.
• Ооруну кенебеген өлөт.
• Ооруну сураса — айыкканга тете (же эсе).
• Ооруну сураса айыкканчалык.
• Оорунун атын айтса ырбап кетет.
• Оорунун жакшысы жок, дарынын таттуусу жок.
• Ооруң жок болсо — котур бол, дооң жок болсо кепил бол.
• Ооруп өлөөр кишинин, дабаа болбос дартына.
• Ооруп турсаң, ойноп турдум де.
• Оорусун жашырган өлөт, боорун жашырган бөлүнөт.
• Оорусун жашырган өлөт.
• Оосурактын уяты жок, аз гана бетке чиркөөсү бар.
• Оосурган кыз оосурбаган кыздын бетин тырмайт.
• Оосурган кыз оосурбаган кыздын бетин тытыптыр.
• Опсуз баатыр жоого түшөт.
• Опсуздун оюну жаман, энесин көткө саят.
• Ор казган өзү орго түшөт.
• Ордон чыккан, тоого да чыга алат.
• Орду жок сөзгө ооз ачпа.
• Ордун таппаган орунсуз калат.
• Ормон опуза.
• Оро албаган орок тандайт, чаба албаган чалгы тандайт.
• Оро албаган орок тандайт.
• Ороздуку он бешинде баш, Чыйырдыкы жыйырма бешинде жаш.
• Ороздуу (бактылуу) менен оттош бол.
• Ороздуу менен оттош бол, ырыстуу менен жолдош бол.
• Орозо — ачкачылыктын иши.
• Орозо кармоо — оокатсыздын иши.
• Орозодо көчкөн — эрмек.
• Орозодо молдолор обондошот битирге.
• Орозойдун баласы отузга чыкканча жаш.
• Орозойдун он тамыры бир келиптир.
• Орозону ач пайгамбар чыгарыптыр.
• Орозонун бирин кармадык, эми эмнеси калды дейсиң.
• Орой уруш десе уугун, кериш десе керегесин ала чуркайт.
• Оройдун он досу да болбойт.
• Орокто жок, машакта жок, даяр болгон кызылга орток.
• Ороктон качкан ыраак чычат.
• Оромол олжо эмес жолго.
• Оромол тойго жарабаса да, жолго жарайт.
• Орто — Токойдо отун жок, Көтмалдыда суук жок.
• Орточолук — озот, катуучулук — тозот.
• Орундуу сүйлөгөндүн ооматы кетпейт.
• Орус араба менен коён уулайт.
• Орус менен дос болсоң айбалтаңды ала жүр.
• Орус сыйлаганына чочко тартат.
• Осмо кетер каш калар, суулар кетер таш калар.
• Осмо кетет каш калат, оомат (урмат) кетет баш калат.
• Осмо кетет каш калат, суулар кетет таш калат.
• Осол өскөн жыгач бутагын көтөрө албас, осол адам атагын көтөрө албас.
• От — жаккандыкы, тон — тиккендики.
• От бар жерде түтүн бар, суу бар жерде береке бар.
• От жаккандын кадырын отун алган билет.
• От жакпай казан аспайт, таң атпай торгой сайрабайт.
• От жалынын билбеген кайрылат, дос жалынын билбеген айрылат.
• От койсоң — күйөсүң, ор казсаң — түшөсүң.
• От менен ойнобо.
• От менен суу — тили жок жоо.
• От өчөт, даңк өчпөйт.
• От түтүнсүз болбос, жигит жазыксыз болбос.
• От чаласынан, сөз чаласы жаман.
• От чыккан жер — жердин түбү, ит үргөн жер — үйдүн түбү.
• Отко жакын шиш күйөт, жеңеге жакын кыз күйөт.
• Отко жакын ыш күйөт, жеңеге жакын кыз күйөт.
• Отко келген катындын отуз ооз сөзү бар.
• Отко таш дагы жарылат.
• Отоолотсо, отоолотсо экен, отоолотпосо торпогумду кайтарат элем.
• Отсуз түтүн жок.
• Оттон качсаң, сууга кир.
• Отту үйлөсө — өчөт, коңшуну көөлөсө — көчөт.
• Отту үйлөсө өчөт.
• Отту чукусаң өчүрөсүң, коңшуңду чукусаң көчүрөсүң.
• Отуз жыл ийилип өскөн тал бир жылда түзөлбөйт.
• Отуз күндүк орозонун, уч күндүк айты бар.
• Отуз өлчөп бир кес, он жолу ченеп бир жолу кес.
• Отуз өлчөп, бир кес.
• Отуз тиштен (ооздон) чыккан сөз, отуз уруу элге тарайт.
• Отуз тиштен чыккан сөз отуз уруу элге тараар.
• Отуз уулду бир ата асырайт, отуз уул бир атаны асырай албайт.
• Отуз уулум болгуча, оосурак чалым болсочу.
• Отузунда ок ата албаган, кыркында кылыч чаппас.
• Отун — олжо, суу - кордук.
• Отун — отко, очок — казанга.
• Отун албаганга от жактырба.
• Отунду жаккан билет, малды баккан билет.
• Отундуунун отун арт, отуну жогуң катын арт.
• Отурган киши ойлонгуча, баскан киши мал табат.
• Отурган кыз орун табат.
• Отурганга олжо жок.
• Оюн барып чын болду, ойнош барып эр болду.
• Оюн бир, тамаша эки.
• Оюндан омуртка сынат.
• Оюндан от чыгат.
• Оюндун тубу — от, ойдун түбү — алтын.