Жүктөлүүдө...
TYUP.NET
Катталуу Кирүү

Ата-эне

Баш барак | Бул ким, ал эмне | Ата-эне

Ата-эне — адамдын үй-бүлөсүнүн негизин түзгөн эң жакын тугандары. Ата-эненин балага карата ролу терең жана татаал мүнөзгө ээ болуп, маданият, дин, тарбия жана улутка жараша ар кандай болот.

Ата-энелер тарбиячы катары баланын коомдогу өзүн алып жүрүүсү үчүн жоопкерчиликтүү. Ата-энеси жок бала жетим деп аныкталат.

Биологиялык ата-эне — баланын нак ата-энеси, өгөй ата-эне — баланы асырап багып алган жана тарбиялаган, бирок биологиялык эмес болгон ата-эне.

Ата-эне

Ар кимдин ата-энеси бар. Сенин атаң — чоң атаң менен чоң энеңдин баласы, апаң — тай атаң менен тай энеңдин кызы. Ар бир ата-эне балам чоңоюп, эресеге жетсе, адам болсо деп тилейт: баласын тамак-аш, кийим-кечек менен камсыз кылат, таалим-тарбия берип өстүрөт.

Ата-эненин балага болгон мээрими, көргөн камкордугу, келечегинен күткөн үмүтү чоң. Атаң менен энең сенин бактылуу балалыгың, кайгы-капасыз жаштык чагың үчүн кам көрүп, окуп билим алышыңа, эмгекке үйрөнүп, акыл-эстүү болуп чоңоюшуңа ыңгайлуу шарттарды түзөт. Балага ата менен энеден жакын адам болобу? Ата-энелердин бала үчүн кылган эбегейсиз зор эмгегин эмне менен өлчөөгө болот? Бекеринен айтпаса керек «Ата-энелер балдардын биринчи мугалимдери» деп.

Сенин баскан-турганың, ар бир жакшы кылык-жоругуң, ата-эненин жүрөгүн элжиретип кубанычка бөлөйт. Мектептен алып келген төрт же беш деген баа атаң менен энеңдин төбөсүн көккө жеткире кубандырарын унутпа.

Тескерисинче, кетирген кемчиликтериң, окууга, ишке болгон эринчээктигиң, шалакылыгың, ата-энеңди капалантып, сары санаага түшүрөрүң да дайыма эсиңде болсун. Сен алардын эмгегин сыйла, урматта! Бош убагыңда колдон келишинче үй жумушуна жардам бер. Ата-энең менен сыймыктан!

Адамгерчилик, ак ниеттүүлүк, жоопкерчилик, эмгекти сүйүүнү да негизинен ата-энеңден үйрөнөсүң. Силерден улуулардын көргөн-билгендери көп, тажрыйбасы бай. Ошондуктан алардын жаштарга, өз балдарына айтар кеп-кеңеши, үйрөтөр өнөрү да арбын. Айрыкча алар картайган кезде жакшы каралаш, кейитпе, көңүлүн көтөрүп, кубант, ден соолугун сакта. «Улууга — урмат, кичүүгө — ызаат» деп айтылат кыргыз элинин макалында, өзүңдөн улууларды сыйлабасаң, өзүңөн кичүүлөр да сени сыйлабайт.

Жайгаштыруу: 2016-05-22, Көрүүлөр: 15155, Өзгөртүлгөн: 2024-02-21, Тарыхы
Талкулоо Оңдоо/Толуктоо
Сайтка жарнама жайгаштыруу