Пржевалдын (Караколдун) бактары — ыр, музыкалык чыгарма
Пржевалдын (Караколдун) бактары — ыр, музыкалык чыгарма. Сөзү Ж. Апазов, обону А. Коробаев. Каракол жөнүндө ырларга таандык болушу мүмкүн.
Тизип койгон жашыл шуру саптары,
Бугу мүйүз булбулга бай шактары.
Кыз-жигиттин кыялынан бүткөндөй,
Кымбатым сен Пржевалдын бактары.
Көчө бойлоп көлөкөлөп көп өтөм,
Жүрөгүмдү көрктүүлүккө бөлөтөм.
Ак көйнөкчөн селки экен деп кайыңды,
Ак сүйүүмдү жүрөгүмө түнөтөм.
Шыбырашкан селки-уланга теңеп көр,
Шынаарлашат шынга бойлуу теректер.
Канча сырды бутагына жашырып,
Канча ырдын кайруусуна себепкер.
Тизип койгон жашыл шуру саптары,
Бугу мүйүз булбулга жаш шактары.
Кыз-жигиттин кыялынан бүткөндөй,
Кымбатым сен Пржевалдын бактары.
