Канаттууларды союуга даярдап бордоп семиртсе этинин сапаты жакшы болот, жана жаш канаттуулардын салмагы 40-60%, чоңдорунуку 20-25 %га көбөйөт. Канаттуулардын этинде толук сапаттуу белоктор 19,3 % , башка малдардын этине караганда көп болот. Тоокторду, үндүктөрдү бордогондо өзүнчө бөлүп багыш керек. Бордоп семиртүүгө дан эгиндеринин бардык түрүн, сүт азыктары, жумуртка, бышырылган картофель, кызылчанын түрлөрү ж. б. колдонулат. Айрыкча канатуулардын этин агартуучу тоюттар баалуу болуп эсептелет, алар теринин астындагы майлардын өңүн агартып , эттин товардык баалуулугун көтөрөт. Бул тоюттар: ак жүгөрүнүн, сулуунун, буудайдын уну, ушул эле дандардын өзү, тегирмендеги ундун чаңы, быштак, көк сүт, жумуртка жана башкалар. Арпа , сулуу, буудай жүгөрүнү тартылган жем ( жара тартма) катарында берсе жакшы. Жемди кургак бербей сууга, сүткө, эт – сөөктүн калдыктарынын сорпосуна аралаштырып берсе, сиңимдүү болот. 100 гр кургак жемге 130-150 гр суюктук аралаштырылат. Бордоп семиртүүдө канаттуулар өздөрү каалашынча жегидей кылып же болбосо күчкө салып машина менен жемсөөсүн толтуруу жолдору колдонулат. Канаттуулардын кыймылын азайтып клеткага кармап бордоп семиртүү эң жакшы натыйжаларды берет.
Канатууларды бордоп семиртүүнүн таблицасы:
| Канаттуулардын түрү жана жашы | Бордоп семиртүү мөөнөтү | Салмак кошуусу | 1кг салмакка кеткен тоют(кг) | I-категориядагы эттин чыгышы % |
| Тооктун балапаны 400-700 гр чейинки салмакта | 22күн | 50 | 5,5 | 55 |
| Балапандар 700 гр өйдө салмакта | 18күн | 20 | 7,5 | 30 |
| Чоң тооктор | 10күн | 8 | 8,5 | 50 |
| 50күнгө чейинки өрдөктөр | 15күн | 25 | 5,5 | 60 |
| Чоң өрдөктөр | 15күн | 18 | 7,5 | 50 |
| Каздар | 17күн | 22 | 7,5 | 60 |
| 4 айга чейинки үндүктөр | 20күн | 70 | 5,2 | 45 |
| 4 айдан жогору үндүктөр | 18күн | 20 | 8,0 | 40 |
| Чоң үндүктөр | 15күн | 14 | 9,0 | 50 |
Төмөндө тооктун балапандарын тюттандыруунун шарттуу түрдөгү рационун карап көрсөк (грамм)
| Тоюттун түрү | Канаттуулардын салмагы | |||
| 0,8-1кг | 1,5-1,7кг | |||
| 1 башка | 1кг салмакка | 1 башка | 1кг салмакка | |
| Жүгөрү уну | 24 | 27 | 37 | 23 |
| Буудай жеми | 15 | 17 | 24 | 15 |
| Буудай улпагы | 10 | 11 | 17 | 10 |
| Сулуу уну | 9 | 10 | 14 | 9 |
| Арпа жем | 16 | 18 | 24 | 15 |
| Бор (үлүл кабыгы) | 1,4 | 2 | 3 | 2 |
| Туз | 0,8 | 1 | 1,5 | 1 |
| Кум | 0,8 | 1 | 1,5 | 1 |
| Бышкан картөшкө | 20 | 21 | 28 | 18 |
| Бардыгы бир күнгө | 97гр | 108гр | 150гр | 94гр |