Токомбаева Айсулуу Асанбековна


Токомбаева Айсулуу Асанбековна (1947-жылы т., Бишкек ш.) – балет артисти, Кыргыз ССР эл артисти (1975), СССР эл артисти (1981).

1966-ж. Ленинград хореография окуу жайын бүтүргөндөн кийин А. Малдыбаев атындагы Кыргыз мамлекет академиялык опера жана балет театрынын артисти, 1967-жылдан солисти.
Токомбаева – өз өнөрү менен лириканы, драманы, трагедияны бирдей деңгээлде чагылдырып, ишенимдүү аткарган техникалуу балет артисти.

Чолпон (М. Раухвергер, «Чолпон»), Асел (В. Власов, «Асел»), Мария (Б. Асафьев, «Бахчысарай фонтаны»), Одетта-Одиллия (П. И. Чайковский, «Ак куу көлү»), Фригия (А. Хачатурян, «Спартак»), Свобода (М. Равель, «Болеро»), Жизель (А. Адам, «Жизель»), Толгонай (К. Молдобасанов, «Саманчынын жолу» балет-ораториясы) жана башкалар.

Токомбаева – кыргыз искусствосу менен адабияты күндөрүнүн (Өзбекстан, Латвия, Белоруссия, Эстония, Литва) катышуучусу, хореографиялык концерт номерлеринин бүткүл союздук конкурсунун дипломаты.
Россия, Польша, Болгария, Финляндия, Ливия, Тунис, Швеция жана башкалар өлкөлөрдө гастролдо болгон.

СССР мамлекет сыйлыгы (1976) жана Кыргызстан Ленин комсомолу сыйлыгынын (1969) лауреаты.

2016-08-10 331 Башкалар Жыргалбекова С. 2016-08-10