Бул жерде Сиздин жарнама болушу мүмкүн! 0(707)48-14-46 whatsapp

Европа

Европа грекче батыш деген сөз. Байыркы гректер Грециянын батышына жайгашкан аймакты ушундайча аташкан. Европа - эң чоң Евразия материгинин составына кирген дүйнө бөлүгү. Ал өтө зор жарым арал сыяктанып, үч жагынан океан жана деңиз суулары менен курчалган. Ал эми чыгышта анын Азия менен чектешкен кургактыктагы чегарасы түндүктөн түштүккө созулуп жаткан Урал тоолору, Эмба жана Маныч дарыялары аркылуу өтөт. Европада 30дан ашык мамлекет орун алган. Мисалы, Улуу Британия, Франция, Германия, Италия, Рольша, Венгрия, Румыния, Россиянын батыш бөлүгү жана башка мамлекеттер. Калкы өтө жыш жайгашкан, анда өнөр жайы жогору өнүккөн шаарлар көп. Европанын табияты ар түрдүү.

Чокусун мөңгү баскан Альп сыяктуу бийик тоолору да (анын эң бийик чокусу Монбландын бийиктиги 4807м), жыш токой баскан орто бийиктиктеги тоолору да (мисалы, Карпат), кең түздүктөрү да, ойдуңдары да бар. Түздүктөрдө суусу мол дарыялары (эң чоңдору - Волга менен Дунай) жай агат, тоолордо чоң эмес, бирок бууракандаган өзөндөр шаркырайт. Европада тузсуз жана туздуу көлдөр көп (эң ирилери - Ладога менен Онега, өтө туздуулары - Эльтон менен Баскунчак). Европаны курчап турган көптөгөн деңиздер менен булуңдардын жээктеринде кеме токтоого ыңгайлуу буйткалар көп. Мындай жерлерде порттор курулган. Дүйнөдөгү эң ири порттордун бири - Роттердам Европанын чакан өлкөсү - Нидерландда. Европанын климаты да эң эле ар түрдүү. Түндүктө, айрыкча Уюл тегерегинен ары өтө суук, көпчүлүк бөлүгүндө мелүүн, Жер Ортолук деңизи менен Кара деңиздин жээктеринде жыпжылуу. Адамдардын чарба жүргүзүшүнүн натыйжасында Европанын табигый өсүмдүктөрү кыйла өзгөрдү. Эгин талааларында буудай, кара буудай, сулу, арпа, кара күрүч эгилет, жүзүм, зайтун, апельсин, алма, алмурут, кара өрүк өстүрүлөт. Адамдар көптөгөн жапайы жаныбарларды жок кылып жиберишти.

Бирок тундра, токойлуу талааларда дагы эле алардын бир топ түрлөрү жашайт. Мисалы, үлпүлдөк жүндүү песец, тыйын чычкан, күлүк жана шамдагай бугу, багыш, ала-була бурундук, карышкыр, түлкү, аюу, коён, доңуз. Токойлордо күкүк, тоңкулдак, ала чымчык, таранчы, чабалакей, кекилик, чил, булбул сыяктуу ар түрдүү куштар бар. Ал эми Түндүк Муз океанында ак аюу жашайт, жарлуу жээктердеги аскаларга жайкысын канаттуулар уя салып төлдөшөт. Мында алардын базары пайда болот.

Оставьте комментарий!

Пикириңиз текшерилгенден кийин жайгаштырылат.

Вы можете войти под своим логином или зарегистрироваться на сайте.

(обязательно)